ENDÎ BES O

 

 

 

 

 

ENDÎ BES O[i]

 

Wexto ke ti qaytê mi kena,

Fekê mi beno zuya,

Çimê mi benê tarî,

Û ziwanê mi fekê mi de beno distarî.

Ya!

Gula mi,

Naye ra xebera to esta,

Ti çixa zulimkar a.

 

Çend şewî ke 

Ti bîyene meymanê  hewnanê mi,

Mi ti hewnê xo de ardene berdene,

Û tewr xebera mi kî mi ra çîne bîye.

Ya!

Gula mi

Naye ra xebera to esta,

Ti çixa zulimkar a.

 

Çend rojî ke

Ti kewtine fikrê mi

Û to fikrê mi kerdene te ser û te bine ra,

To ez aleznêne ro.

Ya!

Gula mi

Naye ra xebera to esta,

Ti çixa zulimkar a.

 

Çend defê ke ti huyene

Nê biskanê to û biruyanê to kaykerdene bîyene sey tîrke-tîrkevanan

Û ginêne cîgeranê mi ra,

Cîgerê mi bîyene letê-letê

Tewr xemê to nêbî

Ya!

Gula mi

Naye ra xebera to esta,

Ti çixa zulimkar a.

 

 

Wext bî ke

Vinike ginêne mi ro

Mi çimî nêne werê

Ti kewtine re xeyalê mi

To nêverdene ke ez çimanê xo rakerî

Û to ez verê şarî de kerdene rezîl û rusva verdene ra.

Ya!

Gula mi

Naye ra xebera to esta

Ti çixa zulimkar a.

 

Ge-gane ke

Ti bi bejna xemla barîye

Verê mi ra verena ra,

Ez recefîna û royê mi

Leşa mi ra ancîno we.

Ya!

Gula mi,

Naye ra xebera to esta

Ti çixa zulimkar a.

 

Endî ê to bes o ,

Endî ê to bes o.

 

                                                                        Murat ÇÎÇEK

                                                                                          03.2013

     

                       

 

---