DERDÊ PÊXEMBERÎ

DERDÊ PÊXEMBERÎ

Tenîya…  Quncikênda kaînatî di…Quncikênda dinyayên di… Quncikênda Koyê Nûrî di… Kâfa Hîrayî di… derdê dinyay qaxûyê Pêxemberî(asm)…

            Ezîyet, cefakêşey, raya hîdayetî, raya ‘edaletî, pêro qandê ki; karwana însanan şaş nêbo,  vera Allahî şiro. Na raya adirinira, na raya da’finira, na raya dinyayîra ravirdiş do asan nêbo! Bê rehber ravêrdiş do tew asan nêbo!

Qehr…ezîyet…cefakêşey, mahneyê nê vajekanan pêxemberan di biwanên, mahneyê xwu do wijadi bivînê en vêşî…

Ebû leheb bi xezebêna, cenîya ci bi tellî û ziwandergeyêna, Ebu Cehîl bi vêrê devanan, bi kibrêna kewtî vernîya rayida Resûlê Ekremî!

            Qehrê Mekke’yî… Sîyê Taîf’î… Munafiqê Medîney’î to sero arêbyaybî pêro pîya… Sûka Mekke’y torê bîbî tengi, torê bîbî xerîbi! Sûka Taîf’î di, to sero sî varê! ‘Huzûrê Ka’bî di torê heqaretey bî! Kuçeyê toyê qeçekîneyi di, telî û dirikîy ruway! Sûka Medîney torê bî war!  Torê bî Aîşe(ra)! Torê bî sehabe(ra)! Torê bî minber! Torê bî dewleti!

To derdê xwu karit, mu’mînîy ruway! To derdê xwu karit însaneteyi ruwê! Yesrîb şî, Medîne amê, Medîne amê medenîyet ruwê!

Medîne…

Warê birayan…

Warê Ensar û Muhacîran..

Warê şêran…

Resûlê Allahîyo (asm)…. Heme mukâfâtîrê elyaq oyo!

Keda ey ma kê sero çinya ki?

Reheteyên nêdî Pêxemberî(asm)!  Bexçeyê zerîya xwu di en vêşî ey derd karit! En vêşî ey qehrê însanan ant! En vêşî ey xwurê însan kerd derd! Meşt do sebo! ‘Halê însanan bahdê dinyay do sebo? Ewro çinyose îman, meşt do jî çinêbo rehetey!

To va “Nê cahîlyê, nêzanê!”

Rihma to besê dinyaybî! To zerî di wesariy qedyayê! Wesar çimê to bî! Amnanî awka hûniki tibî! Roj ti bî! Istareyê to estî bî! Istareyê serê ‘erdî bî! Ebûbekir(ra)…  ‘Umer(ra)…  Osman(ra)….  ‘Elî(ra)… Hesen(ra)….. Huseyn(ra)…….

Derdê xwu kerd mêrasê xwu! Kam mêrasê ci bigîro qaxûyê însaneteyi gîno! Sehaban ‘erdo nêverda…

Kewtîy rîyê ‘erdî qandê Allahî(cc)…

Qandê xatirdê pêxemberî(asm)…

Qandê însaneteyi…

Ki; însan ageyro xwu, ageyro reb dê xwu, ageyro war dê xwu…