WESÎYETÊ SOFÎ Û HAFİZ MEHMÛD

WESÎYETÊ SOFÎ Û HAFİZ MEHMÛD

Hafiz Mehmûd, bi raştey, keso ki vengê ci nêecibno, rîdê dinyay di çinyo. Muezzînêndo delalo ew hem jî kuşatkârêndo bêhemtayo.  Hazircewabey di jî  milleti mîyandi meşhûro.

De cemaatê Hafiz Mehmûdî ra jew sofîyêndo extîyar, tim cemhetî mîyandi vano:

-Bewnên cemhet! Şima şahîdîy bê ki, Mela Îzeddin ti jî şahîd bi ki! Ez ki merda bê Hafiz Mehmûdî kes do mi nêşiwo ha!

Bi no hawaya kotî di raştê pê Hafiz Mehmûdî yeno, sofîyê ma tim xwurê cemhetîy keno şahîd û Hafiz Mehmûdî keno esîrê wesîyeta xwu.

Hafiz Mehmûd hewneno no do hina nêbo. Sofî tim qalê merden û şiwitena xwu keno, fek Hafiz Mehmûdî ra nêvradano!

Sofîyê ma rojê nêweş kewno, Hafiz Mehmûd û Mela Îzeddîn ew dîrêna cemhetîya pîya şinê persê ci bikerê. Kewnê zere:

-Selamun Aleykum!

-Aleykum Selam!

-Şima xeyr amey!

-Xeyrî miyandi bê! Allah şîfaya xeyrî bi do! To rê kefaretê axretî bo inşellah!

-Allah şima ra razî bo! Allah xeyrê şima qebûl kero inşellah!

Ew sofîyê ma cayandê xwu mîyandi fina cemhatî xwurê keno şahîd ew vano:

-Cemhat bewnên cenazeyê mi Hafiz Mehmûd do bişiwo ha!

Hafız Mehmûd jî bi hêrsa vano:

-Ma ez Tîllo di ba jî eza qandê to bêra heta Wêranşar?

Sofî vano:

-Qeçên mi do bêrê to bîyarê ti tew qaxû megî!

Hafiz Mehmûd heyret maneno, weyneno no sofî raşteraşt do zey xwu bikero. Ew qandê ki sofî fek cira verado, nezdîyê ci beno, bi vengêndo nizma cirê hina vano.

-Ez kê şiwenase ey verî verî xeseynena ha! Ti ney bizanê yanê!

-O çiçîyo la! Qandê çiçî ti xeseynenê?

-Qandê ki, ‘horîyên ci mirê bimanê!

Nê kilaman dê Hafiz Memûdî serra, sofî bêhemd, bi vengêndo berza vano:

-Mela Îzeddîn! Cemhat! La lazim nîyo! Hafiz Mehmûd wa mi nêşiwo! Ez wasîyetê xwura ageyraya! Bê Hafiz Mehmûdî kam mi şiweno wa bişiwo!

-!!!!!!!

Hafiz Mehmûdê ma,  bi no hawaya xwu fek û wesî yê sofîra reyneno, rehet keno.

 Nûştiş mara, wendiş û huwatiş şimara!

Ö.FARUK ÇETİNKAPLAN