GİLÎY ÇEND PRODEYÊ JÎ KOK VİNÎ NÊBENO

GİLÎY ÇEND PRODEYÊ JÎ KOK VİNÎ NÊBENO

          Coyê ma di, bol çî estê ki;ma bê şik ê çîyan tercîh kenê. Neyrê Bedîuzzaman vano “Quwwe-î Saîqa”. Yanê ma weynenê ki mayê vera jew hedefên şinê. Di coyê ma di bol ornagê ci estê. Mesela ez xwu sero ek hebên çîyan vaja, şimado vajê Allah! Allah!

          Ma mektebi di sinifa hîrini di, ez û di embazên xwuya ma vijîyayê dês dê hewş dê mektebî ser, ma pêro pîya azan wendên. Ewro ma, nê hîrê embazî jî  xwocayîni kenê! Allah û Tealay  wezîfeyê ma qeçekînra marê kerd bî şîrin/kerd bî bellî. Ma qeçekînra kewtîbî na rayi ser. Birayê mi Tehsînî  destira hirag û text û mêxîy nêkewtê, meraqêndo ecêb sero esti bî. Maya mi rehmetî vatê:

        -Neyra senetkarêndo weş do bivijîyo! Heqeten roj ame, serrî ravêrdîy, birayê mi bî hostayê ceyranî û kewt senetkârân mîyan. Kurmancîy vanê:

-Berxê çê ji kozê de bellîyi.

Însan bi qabîlîyet û huneran dê xwuya pîya yeno dinya. Mexlûqatîy senîn ki  paştî danê pê, miqayteyê pê benê , bi no awaya coyê êlî jî encax bi paştî û yarmeteya dewam keno. Çaxanoki jew ‘edetên şar dê ma mîyanra hewadeyo, o ‘edet do tenya bimano ew vinî bo.

          Eza qeçekînda xwu ra jew ornagêndo ‘ecêb bida şima.

          Ez mekteb di pola diyinî di, mi bi dimilî nûştey nûştê. Labrê mi weynayê ki; herfê mektebî bes dê dimilîda ma nêkenê. Mi xwu verra, ê herfên ki di tirkî d içinîyê mi goreyê qaydeyê xwu ê herfîy viraştî.. May û pîyê mi mirê vatê:

–          Ma oxil dimilî qe nusîyêno? Dimilî û nûşteni!

       Mi xwu heti vatên qey, bi kurdîya ti kitabên rîdê ‘erdî di çinîyo. Mi vatê qey no dinyadi tenya mi dest bi nûştişê dimilî kerdo. Ez tana bîya gird tepîya, ez xwu serî şîyê çarşîyandê Sêwregi di geyrayê. Ma şewrane, wextê Azanê Muhemmedî(asm) di, şîyên datlî herînayê ew ma kuçandi geyrayê, şewra şewra ma qîrayê, ma qeçan aya kerdê ki;may û pîyên qeçkan datlî biherînê. Bi karê datlîyana mi şîyê kitabîy herînayê. Pereyê mi kitabênrê bes nêkerdê, labrê kitabrotok mirê bi deyna jî dayê. Rojên wîtrînên kitaban di mi “Dersên Zimanê Kurdî” senîn ki nêdî! Ez şaş û mat menda! Ez çolistanî mîyandi, zek raştê awa zemzemî bêra. Fîyetê kitabî nîno mi vîrî, hema goreyê kar dê datlîyandê mi vay bî.

         Meştêrî ez daha bi qeyretêna warişta şîya datlî ew bahdê kâr dê xwuya ez şîya mi kitabê xwu girot. Dunya bîbî ê mi. A roj no rojo, eza nûsena, eza xwu bi nuştena dimilîya îfade kena.

        Vatişê mi noyo ki;jew heqîqetên çend bêro nimiten jî do cana ra biriwo/bişkorîyo! Gilîy çend prodeyê jî kok vinî nêbeno! Kerxaneki sero nefel kiho nêbena!

        Her çî ageyreno ‘esl dê xwu ser!

                                         Ö.FARUK ÇETİNKAPLAN