HER NÊ KIRRİ

*HER NÊ KIRRİ*

Dewêde jew merdimî rê, dewija cirê tim vatê Her, vatiş vatişa nameyê ney merdimî dewde beno her

Xeyle wext wina ravêreno mêrdek zewjîyeno, cirê qeçekî benê û hewna zî dewijî cirê vanê her

Hema Cenêka mêrdekî, mêrdeydê cirê her vaten weştê cenêker nêşino,

Na mêrdeyê xorê vana ki;

-Mêrdek şo qahwedi dew û dewijan rê vaje (ez qayîl nîya şima mirê vajê  her)

Mêrdek kewno ray û şino qahwe, xeylê dewijî qahwedi benê, 
keverdê qahwî vero vindeno û vengdê pêtina vano;

-Hele pêro deqqeyê goştareya mi bikerê

Merdimê ki qahwedê pêro weynenê pêra. vanê (a her ame keno se vajo)

Mêrdek vano ki;

-Hetan nika şima tim û tim mirê va her

Ez deha qayîl nîya şima mirê vajê her

Dewijî vanê; Ey ma torê se vajê ?

Mêrdek vano ki; La mirê me vajê her, se vanê, vajê

Dewijî vanê; ey wûnî vatiş rahat nîyo, 
ti en rindê ci, dewija rê şamîyêna weş viraze û veynde dewija pêrin wûcade pêrin rê vaje… 
Ez qayil nîya şima mirê vajê (her) û wa wûcade dewijî zewmbî namena toyanê

vanê beno ?,o zî vano e beno. û mêrdek kewno ray şino keye û heme çî cenêker da xorê vano.

Beno şewra mêrdek gêno didi, hirê mî/kavirî cikeno û şamîyêna weş virazeno û veyndano dewija pêrin

Dewijî pêro yenê nan û şamîya xo wenê, mêrdek dewija vero hendo ki weş vindeno ki,

Keno xo vira dewija rê vajo (mirê mevajê her zewmbî namena minanê)

Dewijî nanê xo wenê û vijyenê şinê

Cenêka ci yena mêrdekî het û vana;

Mêrdek dewija nameyê to çiçî na pa ?

Cenêk senî vana, yeno ney vîrî û vano, eywax mi kerd xo vîra

Cenêk vana; ti senî xo vîra kenê ?

Vano willay mi xo vîra kerd

Cenêk vana; rew bireme hewna dewijî nika vila nêbiyê, ray sera cirese û vaje

Mêrdek hema sewlanê xo, keno xo pay û kewno dewija dim û reseno dewija, 
xeylêna vindarneno û vano;

La qisûrdê mi meweynê, mi qandê çîyê veynda bî şima û qandê coye mi şamî viraşt bî 
Hema ez kewt bîya qaxûyê şamî qandê coya mi xo vîra kerd şima rê vajo û dima vano ki;

Ez deha qayil nîya şima mirê vajê her, boka şima nayra tepîya zewmbî namena minanê

Devijî vanê; Beno ma nayra tepîya torê nêvanê Her, mado nameyê bivirnê û vanê

Wa nikara namey to kirrî bo. Mado torê nayra tepîya vajê kirrî

Dewijî vanê beno ? no vano beno û dewijî benê vila, mêrdek zî kewno ray û şino keye.

Cenêka ney yena ney het vana;

Dewija namey to virna ?

Mêrdek vano E virna

Cenêk vana  çiçî na pa ?

Mêrdek qirra xo keno berz û vano;

Nayra tepîya keso mirê nêvajo her,

Ê do pêro mirê vajê kirrî, namey mi nayra tepîya kirrî yo

Cenêk vana;
La axmaxo axmax *HER NÊ KIRRİ*, ma kirrî zî dina serrî dima beno her

 
(a roc na roc ra Sêwregde ek çîyêno zey pê vacîyeno se vanê *Her nê kirrî)

Nûştox: Celal Nergîz… 22/11/2011