MERRÎ Û Bİ BEQÎYA

Vanê rojên merreyên û beqêna pêya benê dostîy. Nê di dostîy derî vero xwurê doş benê. Noqra beq[1] awi di, merre jî awi vero coy[2]êno. Cora pêhet amîyayîşê nînan çetin beno. Rojên merre, beqîrê vano:

-Dostê mi, ez yena ki xwurê bi toya qisey bikera, ti çinîyê. Ti tim awi mîyan di benê[3]. Cora ma qe nêşenê bêrê pêser[4], ma nêşenê xwurê qe dîrê qisekîy jî bikerê.

‘Hurna hembazîy fikirênê, şik benê ki do se kerê û nê grî[5] senîn ‘hal bikerê?

            Wel’hasilê kelami, dima qerarê xwu danê ki, ‘hurdina jî do xwu bi resenêndo derga bi mîyanedê xwuya ew bi pêya grêdê. Kam ki qayîl bo bi ê bînîya qisey bikero, do bi no babeta ê bînî bianco û pa qisey bikero. Nê ‘hurdina dostîy do bi no şikla jî nê grî serra bêrê[6].  

Nê qerarî serra xeylên wext ravêreno, merre yeno derî ver ki resenê hembazdê xwu bianco û xwurê pa dîrê qisey bikero, winîno ki qijikêna xwu corra verdana cêr ki merrî perro û merrî bigîro, xwurê bero bûro. Qijiki bi pêtêna xwu verdana vera cêr û xafildera[7] bena bi merrîro û merrî werzanena, bena. Noqra senîn ki merre kewno dîyar, beqê mao ki bi resendê cîya grêdeyao, o jî awi mîyanra pa vera cor ancêno û kewno dîyar[8]. Ê  ki ney vînenê, şaş manenê. Şarê çoşmî vano:

            -‘Ecêba grana! ‘Eceb qijiki çi feqi ronê ki beq wina mîyanra vet û berd?  Çiki beqî awida ğorîyeri mîyanra vetiş û berdiş, do ‘hend jî gengaz[9] nêbo. Wel’hasil, qijika to vîstên cor di firrena tepîya, raştê ro[10]yên yena. Ûja di veyndana hembanazdê xwu û vana:

            -Hey hembazêno! Bewnîyê, mi di seydîy finêra tepiştîy. Şimayê nêvînenê ez çendên ercîyayê[11]ya? Senîn ki qijika to qisey kena û nê pesn[12]anê xwu dana, seydê cîyê delalîy ci fekîra şeqit[13]ênê û vera cêr ray gînê.

Merre û beqîya gunenê awi mîyanro. Beq xwura awi mîyan di coyêno, qando ki merre awi mîyan di nêfetisîyo[14] gîno beno roy vero verdano. Dima aqil yeno nînan ser, gînê resenê mîyanedê xwu akeno. Çiki sebebê şîyayîşdê beqî no resen bî. Dima beqê to şino xwu verdano ğorîyeyda awi bin ew merreyê to jî xwu erzeno qindirğan[15] û qirş û qal[16]dê verdê roy ew çiman verra beno vinî.

Wel’hasilê kelami, beqî û merrîya bi no babeta qijiki û mar û morîrê werd bîyayîşra reyênê.    

Dosteya beqî û merrî fina dewam kena. Laberê finakî xwu winî bi resenêna pêya nêgrêdanê, qederê xwu jew nêkenê.

        Açarnok:

              Şaban ŞENATEŞ

          12/09/2013 SUWÊREK’i

BİNVAJE: No eser, mi ‘’Bi Tewsîyedê MEB.îya, 100 Eserandê Weçîneyayanra 28, Qandê Sinifandê 1’an, Weşanandê Zambak(înan jî Mesnewî’ra)’îra açarnao.