BACO’YA ALANQOZ’Î

BACO’YA ALANQOZ’Î

Bî pancês serrê, kerdi veyvi.

Amê vîst, bî sêkuri, pîyek merd.

Mêrde sêkur, a sêkur, kaşê Alanqoz’î.

Ban çinêbî, va ma ban vrazê.

Bi virara sîy kirriştîy, mîyane bî seqet

Cirê nê banîra fitiqê mîyanî mend.

Ban kerrandês bî, va ma bidawê.

Dawitenda ‘herrda sipêra cirê

kulê qesberi mend.

Rojên ban veşa, dewanra asa.

May va, hawar banê kê veşa?

Nêzana kili kê keynerra werişti

Kê keynerda ci veşa

Ban veşa, mendîy cilda sîya ser

O ki Ellay da bî, sebrê qulîyo

Alanqoz koy û kaşîy bî

Pîze mird nêkerd, kewtîy ğurbetey

Bi Bursa’o vijîyay

Ğerîbey çetin, karê şarî çetin

Bêqeçey barî sero bar bî, bêqeçey çetin!

Gencey şî, pîrey amê nezdî

Nêweşîna xwu genceyra ardi bî

Ci ser bî gran, cirê kerd te’hda

kiştênra nêvijîyayê boy, kiştênra tewayê mîyane

‘Emir hinî şî, gencey qedînê

Mêrde bî nêweş, qergûn şî re’hmet

A jî tenîya mendi, whêrê bêkesan Ellah

Bira kerd cirê embaz, cirê bî dest û doşî

Ban vraşt biray, fina bî sûkiji

Baco’ya Alanqoz’î bî bî Nene’ya sûkiji

Tam nêdî bî gencey di, tayên sûki dî

Çend darîy ‘hewşdê xwu di karritîy bî

Rojîy kalan û awdana ravêrnay

Bi no ‘hesaba qedînay pancês serrîy

Gencey di tam nêdî bî, pîrey di huwê

Ey jî bol nêramit, nêweşîya xrabi fek eşt bi ci

Meramê Ellay bî Baco sero, ma se kerê

Nêşa lingi xwu verşano, lingîy bîy kûtîy

Doş bîyê çoşmedê bandê xwu,

Kewti cayan, kewti destan, bî mi’htaca însanan

Bî zê qeçekan, Ellay da bî, ay jî sebir kerd

Boya xwu teng nêkerdi, tim tewekkul kerd

Dayîş Ey’ra, grotiş Ey’ra

Sebir bidi ma Rebbê ma

Sibat 2011, Suwêreg’i

Recep YİĞİTBAY

Binvaje:Na weşbesta/şîîr verê  coy kovara Nûbihar û www.siverekgenclik.com di weşaneyaya.