TEYREKA SAMEDÎ

Marîya bewranan leyrîy vetîy ortmedê ma di

Leyrîy mari kerdîy warî û kerdîy girdîy ûja di

Mari leyrîy pernay û riştîy, leyrîy firray û şîy

Ey  jûka parzane şikîyayê mendi bî ûja di

Ortmedê ma di bî, rojên ez şîya ki aya cêr di

Mi dî ki aya perpizêna, cîqi cîqi kena aja di

Mi kerdi xwu destî û aw û wer da ci ca di

Qirtikên amê axwu teyreka Samedî ûja di

Mi fe’hm nêkerd ki nêweşa, o ca di

Rojna fina ez şîya ser, mi nan û awi dê ci

Mi tenekên paliknê, ez winîyaya ki

Teyreka Samedîya qergûni dirbetina

Hem lingan di, hem parzanî di o ca di

Ez winîyaya mi nêşa cirê darî ca kero

Parzane û linganê ci derman kero

Çiki çinêbî dermanê teyreki o ca di

Mi tenekên şiribê dejî na parzanî ser

Mi va beno ki cirê beno darî ûja di

Dima ez winîyaya ki lingîy jî raşanayê

Ti nêvanê ki kulomekanra lingîy jî

Zêdê parzanî bîyê seqetîy tam o ca di

Samedî û qeçekan şîyê winîyayê pira

Rojên, didi, dîrê rojan pê rapekna o ca di

Maya qeçekan va naya tîyanan pîs kena

A do qeçekan nêweş kero tîyanan di

Teyreka Samedî groti berdi banî ser

Teyreki di rojîy germ di mendi o ca di

Şan di kê ma di estîy bîy meymanîy

Mi înan het di va, ez meşti berî

Beytaran û tixtoran, wa me’hne kerê

Eger ê qebûl nêkerê, mirê şerm kerê

Ez ci berî ‘Hec Osmandê Kafî ser

O cebarnokê estan û tamarano

Wa o bicebirno ling û estanê ci

Ma hewna no ‘hal û hengame di bîyê

Meşti şewdirêrî

Qeçekan şîyê cayê ci a’hewlnayê

Nan û werê ci dayê bi ci banî sero

Roja hîrê Samed senîn ki bî aya

Rema û şî ki fina nan û wer bido ci

Şî ki teyreka ci lingîy raşanayê

Mil kerdo çewtek û ri’h dao o ca di

Samed û Emîna bermay, may kerdîy amoş

Vatê beranê mi, parzaney û lingî şikîyay bî

Beytarîy terkîra, tixtorîy remayê însananra

Nê kotî bewnîyê teyr û tûrîra

Şarî do ma xînt kerdayê, bivatayê nê bûdeleyê

Ma bigrotayê fekî û xwu zuwanî ser

Cora na do xwura bibîyê werdê pisîngan

Laberê nan qirrîdi nêşî war, bîy kelgrî

Çiki a teyreki bêgan kewti  bî o ware di.

20/07/2014 Suwêrek’i  Şaban ŞENATEŞ