……

(…)                                                                      Murat Çiçek
Pîrika Alî, Gulîzare hona newe merdbî. No kî tesîrêde giran da bi Alî ser. Alî kî o sebeb ra nata bota xo texelnêne.
Lajekêde hurdî bî. Emser vera edî ganî bişîyene mekteb. Maya ey Şagule emser ware de tenya bîye. Hem xo rê nan potene hem kî dewe rê merdê xo Silêmanî rê potene. Vindîkerdena pîrika Gulîzare her hîrmînan rê kî zaf giran ameybî. Xora hîna zede kî çinbîyayena aye Şagulede tesîr kerd bî. Çuke a kêyede estune bîye û piştîya veyva xo, pîrika tornê xo Alî defena kî ancîya sey maya veyva xo bîye.
Alî wext ke ameya kêye şî ware lewe pîrika xo de dewe de mendêne. Xora sewbîna kî tim pistinê pîrika xo Gulîzare de kewtêne ra. Emser hal wuna nêbî. Alî teba pisinga xo ra şî bi ware. Maye çend defa ci ra va:
-Law Alo, a pisinge bere berze teber. Ma nêşîkîme xo weyî kerîme.
-Mi lê çik o. Ej pişinga xo nêerzena.
-Ero nêmendîyaye, ez her roj her roj nêşîkîna no serê gilê koyî de saj ronî û nan pojî.
Seke maye wuna va Alî çimî kerdî pirê hesîra, hesîrî çiman ra palaknay û verê xo çarna derê hetê dewe, şana bi rayîr da piro şî.

*no nûşte verê coy rojnemeyê NEWEPEL di weşaneyayo.