BOYA KİLORAN
BOYA KİLORAN
Di wextêndi, namedê Siltan û ‘Eyşxana di way benê. Waya dewlemendi nameyê ci ‘Eyşxana ew a feqîri jî Siltana. Way Siltan, kêberêndê xizanîrê bena veyvi. Mêrdeyê ci bê kar û bar bi. Keye, binê banî di leteyê nanîrê hesret… Qeç û qûl keye di veyşan û teyşan…
Waya ciya ‘Eyşxani, yena Siltani vîrî,. Vana ez şira keyedê warda xwu. Qe beno leteyên nan, taynê toraq, tasê do, pîzey nê qeçeka mirdî kera.
Ew qeçeka şanena xwû dim û şina keyedê way ‘Eyşxani. Qelîşta kêberî ra weynena, way ‘Eyşxana, tewqi sero kilorîy pewjena. Bi kêfêna kêberî dana pro ew veyndana:
-Wayê Wayê! Eza ez. Waya to Siltani!
Way ‘Eyşxani, senî ki kêber ceneyeno, veng şino ci goş. Hima adirî kena hewna û cilên erzena leganda kilora ser. Tewqeri jî vinî kena, dima şina kêberi akena. Rîyên do bi tirş û teala meymanan gîna zerre.
Way Siltani xeylê wext, bi qeçekana xwûrê hewşo veng di roşenê. Pawena ki way ‘Eyşxani vajo, “Bêrê ma bûrê kilorîy…”
Labrê boya kiloran ‘heme cara yena zincîyerda qeçekan. Qeçekîy jî veyşaneyra vanê: ” Dayê dayê! Ka kilorîy?
Waya bê ûjdani, ne nan dana qeçeka ne jî loqmeyên kilorê. Wext ravêreno qeçekîy jî kenê gest bimirê. Qahrû qotik kewno pîzedê Siltani ew dana pro, warzena ki şiro keyedê xwu.
Bi zerîyênda veşatê û şikatêya tewrdê qeçekandê xwuya, keyedê ‘Eyşxani ra kenê teber. Qeçekîy, bê boyerda kiloran tebayê miç nêkenê.
Çiman kenê pîs û peyê milê xwu wirînenê…Way Siltani kêberî vero way ‘Eyşxan’rê vana :
-Wayê! Heger ma qusûrên kerdose, qusûrê ma mewni! Ellah bido re’hetey! ‘Hendayê qedr û qiymet!? Ellah û girdeya xwû! Ma rê boya kilora jî besa…!?
Dewr ravêreno, Siltan sero rojê tengîy qedyenê. Hal û wextê ci beno hewl, kewnê rojê herayan mîyan. De verênan vato: “Dewran serseyênda dara, finê naşta finê aşta!.”
Way ‘Eyşxani sero jî, dinya beno teng û teal. Dewrano verî şino, ê xizaneyi çoşmeyê ci gîno… Mêrdeyê ci, ci binê banî di bi qeçekana veradano ew şino xurbeti. Veyşan û teyşan qeç û qûlîya, binê banî di manenê; ‘hesretê loqmedê nanên benê.
Na fini jî waya ciya Siltani, yena ‘Eyşxani vîrî. Vana ez nê qeçekan bigîra û şira keyedê warda xwu Siltani ki;beno loqmeyên nan, tîkeyê bo jî bi goşta pizzeyê qeçekan mirdkera…
Qeçekanê xwu, şanena xwû dimi û şina kêberî ver.
-Wayê wayê ! Eza ez! Waya to ‘Eyşxani. Qeçekîy vengên aşnawenê, ew remenê marda xwû heti. Dayê dayê! Xala ma Xal ‘Eyşxani amêya…
Way Siltani jî bi rîyêndo beşa kêberî akena ew way û wayzayanê xwu gîna zere. Vera way ‘Eyşxani heti şina ew lewiy nana ci û qeçekan çimana. Way Siltani vana:
-Ti xeyr amêya wayê! Sere û çiman ser ameya! Ma kêf weş bîmi ameyîştê şimaya.
‘Hewşti xeylê wext roşenê aşt û naştîra qal kenê. Qeçekîy xwûrê pîya, mirdîya xwu û bi kêfta xwuya kaykenê…
Way Siltani, meymanandê xwurê, dîk û kergên birnena ew sero jî masto teze nîrena. Riwenê keyîdi, rizê qerejdaxî pewjena. Legana kilora ana qeçekan ver. qeçekîy jî xwurê mirdîya xwu wenê. Pîzeyê qeçekan beno mirdîy; kêf beno kêfê koroy…
Wextê şiyayişî, dismala wayerda xwu kena pirê kîlorîy. Meşka doyi, dana dest û waya xwû kena raşt…
Waya ‘Eyşxani dimira Siltani, na hevalêra xwu (mani) vana:
Bexçe di gulîy wayê!
Wanenê bilbilîy wayê!
Cil bindi mend boya kilora!
Ravirdîy ê rojîy wayê!
Yenê nê rojîy wayê!
Arêkerdox : Meallîm Mustafa KARADAĞLI
Şîrove Biki:
Şîrovey:
Nanê resîmî kulorîy nîyê, nanê tendûrîyo. Ew jew guna adirî mîyanro, rew veji, a do biveşo!
boya kilorana yena mi!
Ûja firûni nîya, ê jî kulorîy nîyê ew nana verêni jî aya ûja di nêasena. Tirim/’eceba a nani weşê yan to veti? To nêşa kilênceyên bivîno?
”Boya Kuloran” weş bîya, tey tayên xetayê zuwanî estê. Ma dewamê ci pawenê.
bi nîyetê kilorana!!!!
Mi heyan penîye bi esq û heyecan wend. Hela ogite ci hetê ra boya giloran hetê ra. Destê to wes bê.
Edebiyatû herem piya nûşnao. Nî meselanî weşa tim bî nuşnî. Ma teşekkûr kenî.
Me’lîmê min şima na estanika wina weş kotra dî? Hey boka nengûy çinê bê way eyşxani xwu bivirîno! Cayê way siltan û comirdanê misilmanan pêro cinnet bo bokarê.
reqlamê maldanan
nûşteyê ki ci manenê
HEWT KERD HEŞT ,HEŞT JI HELÊNAYE Feyza Adabeyi Namedê X ya axayê
(…) Murat Çiçek Pîrika Alî, Gulîzare
‘HEWTIKÎY Vanê rojên di cinêkîy benê, nê pêra pers kenê, pêrê vanê: -Qeçekê to çendê? A jewi vana: -Qeçekê mi ‘hewtikê[1]. Whêra
Nûşteyê tewrê peyênîy
Quncnûştokîy
